Kuri uyu wa Gatandatu tariki 29 Werurwe 2025, mu Mirenge igize Akarere abaturage n’ubuyobozi mu nzego zitandukanye bitabiriye umuganda rusange usoza uku kwezi. 

Mu bikorwa byakozwe harimo gukora isuku ku nzibutso za Jenoside yakorewe abatutsi mu 1994 n’ahandi habitse amateka ya Jenoside, gusibura imiyoboro y’amazi ku mihanda, kubakira abaturage batishoboye n’ibindi.

      Urwibutso rwa Jenoside rwa Mukarange ni rumwe mu zakozweho isuku mu muganda rusange

Ku rwego rw'Akarere umuganda wakorewe mu Murenge wa Mukarange, mu Kagari ka Bwiza, aho Umuyobozi w’Akarere Nyemazi John Bosco ari kumwe n'inzego z'umutekano bifatanyije n'abaturage gukora isuku ku Rwibutso rwa Jenoside rwa Mukarange no gusibura imiyoboro y’amazi ku muhanda ugana kuri uru rwibutso.

Nyuma y'umuganda hatanzwe ubutumwa ku kwirinda ingengabitekerezo ya Jenoside no kwitegura kwibuka ku nshuro ya 31 Jenoside yakorewe abatutsi mu 1994.

                                            Abaturage bitabiriye umuganda bagejejweho ubutumwa 

Agaruka ku myiteguro yo kwibuka ku nshuro ya 31 Jenoside yakorewe abatutsi, Umuyobozi w’Akarere Nyemazi John Bosco, yibukije urubyiruko n’abandi baturage kuzitabira ibikorwa byose biteganyijwe mu bihe byo kwibuka, urubyiruko by’umwihariko bakitabira kugira ngo bamenya amateka y’Igihugu. 

Ati” Turasaba abaturage kwitabira ibiganiro byateguwe mu kwibuka ku nshuro ya 31 Jenoside yakorewe abatutsi mu 1994, kugira ngo dukomeze gufatanya kurwanya ingengabitekerezo ya Jenoside no kumva neza gahunda ya Ndi Umunyarwanda. Urubyiruko turabasaba kwitabira bakiga amateka y’Igihugu ku buryo bazashobora kuyasobanura kuko tubona benshi bafite ingengabiteketezo ya Jenoside bagoreka amateka. “

Nyuma y'umuganda kandi hatanzwe ubutumwa ku kwita ku isuku n'isukura,umutekano,kubungabunga ibikorwaremezo, kurwanya ibiyobyabwenge, kwirinda amakimbirane no kwikura mu bukene.