Kuri uyu wa 16.02.2022, hateranye inama nyunguranabitekerezo yahuje Ubuyobozi bw’Akarere ka Kayonza n’abayobozi b’amadini n’amatorero akorera muri aka karere. Ni inama yayobowe n’ Umuyobozi w’Akarere ka Kayonza NYEMAZI John Bosco ari kumwe na Bishop GAHIMA Manasseh umwepisikopi wa Diocese ya Gahini akaba n’Umuyobozi w’ihuriro ry’amadini n’amatorero mu Ntara y’Iburasirazuba.

Inama yitabiriwe kandi n’inzego zishinzwe umutekano ndetse n’Abanyamabanga Nshingwabikorwa b’imirenge. Atangiza iyi nama ku mugaragaro, Umuyobozi w’Akarere yabwiye abayitabiriye ko inama igamije kungurana ibitekerezo ku mikorere n’imikoranire hagamijwe iterambere n’imibereho myiza y’umuturage. Meya NYEMAZI yagaragaje ko akarere ndetse n’amadini n’amatorero badakwiye kugira inzira ebyiri zitandukanye kandi nyamara zose zigana ahantu hamwe. Ati” uwo twese dukorera ni umuturage, dukwiye guhuza imbaraga kugira ngo ibikorwa byacu birusheho kumugirira akamaro.

 Muri iyi nama nyunguranabitekerezo, Umuyobozi w’Akarere ka Kayonza wungirije Ushinzwe imibereho myiza Jean Damascene HARELIMANA yatanze ikiganiro kigaragaza uko Akarere gahagaze muri gahunda zitandukanye nk’uburezi, ubwisungane mu kwivuza, Ejo heza, kubakira abadafite aho baba n’izindi. Visi meya HARELIMANA yasabye abanyamadini kugira uruhare muri izi gahunda kugira ngo abakristo barusheho kugira imibereho myiza.

Aboyobozi b’amadini n’amatorero bagaragaje ko basanzwe bagira uruhare mu guteza imbere imibereho myiza y’abaturage ba Kayonza babinyujije mu bikorwa bitandukanye nko gutangira abakristo batishoboye ubwisungane mu kwivuza, kububakira cyangwa kubasanira amazu, gufasha abana kubona amafaranga y’ishuri n’ibindi. Gusa basanze uburyo bikorwa bikwiye kugendera ku iteganyabikorwa ry’Akarere kugira habeho guhuza amakuru ibyakozwe bimenyekane. Bakaba basabye ko igihe cy’iteganyabikorwa bajya bahabwa umwanya bagatanga ibitekerezo.

Umuyobozi w’Ihuriro ry’Amadini n’amatorero ku rwego rw’intara y’Iburasirazuba Bishop GAHIMA Manasseh yashimiye ubuyobozi bw’akarere bwahuje amadini n’amatorero akorera mu karere. Yakomeje agira ati” Turi abarinzi b’ubwoko bw’Imana, nitwe dushinzwe bwa mbere kumenya ibibazo abakristo bacu bafite. Dukwiye kubigisha ku buryo imibereho yabo ihinduka.”

Nk’abanyamadini n’amatorero, Bishop Gahima yagaragaje ko bihaye umuhigo wo gukomeza gufasha abababaye bahereye ku baturanyi, gushishikariza abakristo kwizigamira mu ri Ejo heza., kwegera imiryango ifite abana bafite ibibazo by’imirire mibi igafashwa kandi ikagirwa inama n’ibindi.

Inama yasojewe abayitabiriye bafashe imyanzuro itandukanye irimo uwo gukora indi nama ku rwego rw’umurenge ikazagaragaza ibibazo abaturage bafite n’ingamba zo kubishakira ibisubizo mu gihe cya vuba. Iyi nama yo ku rwego rw’akarere hemejwe kandi  ko izajya iba inshuro imwe mu gihembwe.