Kuri uyu wa 01 Gashyantare 2025, mu Mirenge yose y'Akarere hizihijwe Umunsi  w'Intwari z'Igihugu ibirori byabereye ku rwego rw’ Umudugudu ku nsanganyamatsiko  igira iti"Ubutwari n'Ubumwe bw'Abanyarwanda, inkingi z'iterambere".

Ku rwego rw'Akarere uyu munsi wizihirijwe mu Murenge wa Mukarange ku kigo cy’Urubyiruko cya Kayonza, ahahuriye urubyiruko rwo mu Mirenge yose y’Akarere.

Ibi birori byitabiriwe n'Ubuyobozi bw'Akarere n'itsinda ry'Abadepite mu Nteko Nshingamategeko y’ u Rwanda Hon.Ndangiza Madina, Hon.Ndoriyobijya Emmanuel, Hon.Uwababyeyi Jeannette, inzego z'umutekano, abafatanyabikorwa b'Akarere, urubyiruko rwo muri Kaminuza y'u Rwanda Koleji ya Rukara n’urubyiruko rw’abakorerabushake.

Urubyiruko rw’Abakorerabushake bo mu Karere n’Inama y’Igihugu y’Urubyiruko, basinyanye imihigo y’Ubutwari n’ubukorerabushake  n’ubuyobozi bw’Akarere, biyemeza gukomeza gukora ibikorwa bizamura imibereho myiza y’abaturage.

Umuyobozi w’Akarere ka Kayonza Nyemazi John Bosco, yavuze ko mu mihigo urubyiruko rwasinye hakubiyemo ibikorwa bizazamura iterambere ry’abaturage.

Yagize ati” Twayise imihigo y’ubutwari kuko yibanda ku bwitange, gukorana no gufatanya. Ubu hari n’abandi bari ku rugerero bari mu bikorwa biteza imbere Igihugu. Bazita ku bikorwa by’isuku, kwita ku bibazo bibangamiye imibereho myiza y’abaturage, gutunganya imihanda no kujya mu bukangurambaga bushishikariza abaturage kwitabira gahunda za Leta zinyuranye.’’

Umuyobozi w’Akarere kandi yasabye urubyiruko kwigira ku butwari bw’Intwari z’Igihugu, bagakurana umutima w’ubwitange mu byo bakora byose.

Muri ibi birori abaturage baremewe inka 2, imiryango 3 ihabwa ibikoresho byo mu rugo, mu bushobozi bwegeranyijwe n’abaturage b’Umurenge wa Mukarange kugira ngo bashyigikire iterambere rya bagenzi babo ari nako barangwa n’ibikorwa by’ubwitange aho batuye.