Minisitiri w’Ubuhinzi n’Ubworozi Dr. Mark Cyubahiro Bagabe ari kumwe na Guverineri w’Intara y’Iburasirazuba Pudence Rubingisa, yasuye icyanya gihingwamo imbuto ziribwa ku buso bwa Hegitari 1337 na Koperative KOTWIDIKA binyuze mu mushinga wa KIIWP, ari nacyo  kinini kiri mu Gihugu.  

Iki cyanya gihuriweho n’Imirenge ya Kabarondo na Murama mu Karere ka Kayonza n’uwa Remera mu Karere ka Ngoma, gifasha abaturage kubona imbuto ziribwa bakihaza mu biribwa kimwe no kubigemura ku masoko arimo n’ayo mu mahanga bakabona amafaranga bakiteza imbere.

Umuyobozi w’Akarere Nyemazi John Bosco, yagaragaje aho uyu mushinga ugeze ushyirwa mu bikorwa n’ingamba zituma urushaho gutanga umusaruro. 

Minisitiri Bagabe yashimye intambwe imaze guterwa mu ishyirwa mu bikorwa ry’umushinga KIIWP ugamije gukemura ibabazo biterwa n’imihindagurikire y’ibihe birimo n’izuba ribasiraga agace ukoreramo, yizeza abaturage bahinga muri iki cyanya ubufatanye mu gukomeza gushaka amasoko no kubashyigikira mu kurushaho kubyaza iki cyanya umusaruro.

Yagize ati” Intego nyamukuru z’uyu mushinga ni ukongera umusaruro w’ibikomoka ku buhinzi, kubaka ubudahangarwa ku mihindagurikire y’ibihe no kwihaza mu biribwa, abahinzi ntabwo babona amahirwe y’umurimo cyangwa ngo bongere amafaranga gusa, ahubwo banongera umusaruro. Umusaruro uva ku buso burenge Hegitari 1,300 uzatuma hongerwa imbuto zoherezwa mu mahanga ibyo bikazafasha guhangana n’ibiciro byazamutse bitewe n’ubuke bw’ibiboneka ku isoko.” 

Yongeyeho ko Leta izakomeza gufasha abahinzi bagahabwa amahungurwa yongera ubumenyi no kongera ibikorwaremezo bituma umusaruro witabwaho. 

Abaturage bahinga muri iki cyanya cy'imbuto bashimye Leta yabafashije gushyiraho iki cyanya cy'imbuto kirimo kubaha umusaruro bakiteza imbere, bakarwanya imirire mibi kandi bakabona amafaranga yo kwiteza imbere.