Ku itariki ya 01.y’ukwezi kwa Kabiri buri mwaka u Rwanda rwizihiza umunsi mukuru w’Intwari z’Igihugu.Mu karere ka Kayonza umunsi mukuru wizihirijwe kuri Silent Hotel iherereye mu Murenge wa Mukarange. Ni Ibirori byitabiriwe n’Abayobozi banyuranye.Umushyitsi Mukuru yari Honorable Senateri John Bonds BIDERI waje  aherekejwe n’izindi ntumwa za rubanda nka Honorable Depite MUTESI Anitha,honorable Depite SAFALI Bigumisa Theoneste na Honorable MUKAMANA Alphonsine.Mu bandi bitabiriye ibirori harimo abagize inama Njyanama y’akarere ka Kayonza, abagize Komite Nyobozi y’Akarere, Abayobozi b’inzego z’umutekano, Abahagarariye amadini n’amatorero n’abandi.Mu karere ka Kayonza uyu munsi mukuru wahujwe no gusinya imihigo igamije kurengera umwana no kurwanya ihohoterwa, gukumira no kurwanya indwara ziterwa n’imirire mibi, kugarura abana bose bataye ishuri, gukura abana mu buzererezi, gukumira abashora abana mu mirimo ivunanye. Hasinywe kandi imihigo igamije gukura abaturage mu bukene.Ni imihigo izashyirwa mu bikorwa ku bufatanye n’inzego zitandukanye zirimo Abanyamabanga Nshingwabikorwa b’Imirenge, Urubyiruko rw’abakorerabushake ndetse n’Abayobozi b’Imidugudu.

Umuyobozi w’Akarere ka Kayonza John Bosco NYEMAZI yabwiye abitabiriye ibirori by’umunsi mukuru w’Intwari z’Igihugu ko bahisemo gusinya amasezerano arengera umwana n’agamije kurwanya ubukene ku munsi nk’uyu w’Intwari kugira ngo twumve ko tugomba gukomeza kubungabunga ibyagezweho tubifashijwemo no kwigira.Yashimiye abafatanyabikorwa cyane cyane urubyiruko rw’abakorerabushake rukomeje kugira uruhare mu gukemura ibibazo bibangamiye iterambere ry’umuturage.Yabashimiye kandi uruhare rukomeye bagira mu kurwanya icyorezo cya COVID-19.

Kuri uyu munsi mukuru w’Intwari z’igihugu, umusaza MUHAKWA Michel warwanye urugamba rwo kubohora igihugu yatanze ubuhamya bw’uburyo mu gihugu cy’amahanga yavukiyemo Abanyarwanda batotezwaga cyane, bakabuzwa uburenganzira bitwa impunzi ndetse agaragaza ko hari igihe banicwaga ntibahabwe ubutabera. Iryo totezwa akaba ari ryo ryatumye yifatanya n’abandi banyarwanda bagafata intwaro bakajya kubohoza igihugu cyabo.Ati”Nubwo namugaye ubu ndanezerewe kuko ndi mu gihu cyanjye aho mfite uburenganzira bwo kubaho ntatotezwa.

Mu kiganiro cy’umunsi w’Intwari cyatanzwe na Depite Anita MUTESI, yagaragaje ko ubutwari bw’abanyarwanda atari ubwa none.Yibanze ku Rwanda rwo mu hambere ahagana mu mwaka wa 1500, agaruka ku mateka y”abanyabungo bigeze kwigarurira u Rwanda ariko abanyarwanda b’umutima n’ubutwari bakaza kwanga ako gasuzuguro bagatera abanyabungo bakabamenesha bagasubirana igihugu cyabo.Asaba ko ko ubutwari nk’ubwo bwakomeza kuranga abanyarwanda.

Senateri John Bonds BIDERI wari umushyitsi mukuru,yabwiye abitabiriye ibirori ko bakwiye gusigasira ibyagezweho n’intwari zitanze uyu munsi u Rwanda rukaba rwubashywe.Mu kiganiro cye yagaragaje ko hari byinshi byakozwe birimo kuba u Rwanda rumaze kwiyubaka mu buryo bw’ubukungu aho ingengo y’Imari u Rwanda rukoresha, 84% byayo bituruka mu ngufu z’abanyarwanda mu gihe muri 1994 yari kuri 25%.Yasabye ko abantu bacika ku muco wo gusesagura, abasaba gukunda igihugu, kubungabunga ibyagezweho no guharanira inyungu rusange.