Kuri uyu wa 18 Gashyantare 2025, ubuyobozi bw’Akarere bwagiranye ibiganiro n'abafatanyabikorwa mu iterambere JADF, hagamijwe gushyiraho ingamba zo kwihutisha ishyirwa mu bikorwa ry’imishinga ihuriweho mu kwihutisha ishyirwa mu bikorwa rya gahunda y’Igihugu y’Iterambere NST2 izarangira muri 2029.

Ni nama yibanze ku kubyaza umusaruro imishinga mishya igomba kwinjizwa mu ngamba z’iterambere ry’Akarere (DDS), mu rwego rwo gushyigikira ishyirwa mu bikorwa rya NST2.

Iyi nama yahuje abafatanyabikorwa b’Akarere mu iterambere mu bijyanye n’imibereho myiza y’abaturage, muri iyi nama ibiganiro  byatanzwe byagarutse   ku gusobanurira abafatanyabikorwa bashya intego z’Akarere muri rusange ndetse no kwakira ibitekerezo by’abfatanyabikorwa mu iterambere mu rwego rwo kwihutisha no guhuza ibikorwa byabo n’intego  rusange z’Akarere n’iza gahunda y’Igihugu yo kwihutisha iterambere NST2 2024-2029.

Inzengo nk'ubuhinzi, uburezi, ibikorwaremezo, n'ubuzima byagaragajwe nk'ahantu hari iterambere ry’ibanze hakwiye kwitabwaho bityo imibereho y'abaturage ikazamuka. 

Umuyobozi w'Akarere ka Kayonza Nyemazi John Bosco yagaragaje ko yizeye imikoranire myiza n’abafatanyabikorwa mu iterambere,ashimangira  ko binyuze mu bufatanye imibereho n’iterambere ry’abaturage rishoboka.  

Yagize ati” Ubu njye ndizera ntashidikanya ko uko turi hano twese twumva icyo abaturage bashaka kandi ndabizeza ubufatanye bw’Akarere mu gukomeza kuzamura iterambere ry’Akarere kacu n’abaturage muri rusange”.

Mu Karere ka Kayonza babarurwa abafatanyabikorwa mu iterambere ry’Akarere barenga 80.