Kuri uyu wa Mbere, tariki ya 13 Mutarama 2025, mu Karere ka Kayonza kimwe n’ahandi mu Gihugu, hatangijwe Urugerero rw’Inkomezabigwi icyiciro cya 12 ku banyeshuri basoje amashuri yisumbuye mu mwaka wa 2023-2024. 

Ku rwego rw'Akarere urugerero rudaciye ingando rwatangirijwe mu Murenge wa Ruramira mu Kagari ka Nkamba aho abitabiriye urugerero bifatanyije n’abaturage mu guhanga umuhanda ungana Kirometero 4 mu gufasha abaturage guhahirana. 

Umuyobozi w’Akarere wungirije ushinzwe imibereho myiza y’abaturage Harelimana Jean Damascene, atangiza urugerero rudaciye ingando yasabye urubyiruko kurangwa n’indangagaciro zo gukunda igihugu, gukunda umurimo no kurangwa n’ubwitange mu bikorwa bazakorera abaturage. 

Yasabye kandi ababyeyi ubufatanye mu gushishikariza abana kwitabira urugerero. 

Uyu mwaka mu Karere hose urubyiruko 1,604 bagize icyiciro cya 12 cy’Intore z’Inkomezabigwi nibo bagiye gukora urugero rudaciye ingando.

Ibikorwa by'imirimo y'amaboko n'ubukanguramba bizakomeza gukorwa kugeza urugerero rusozwe tariki 28 Gashyantare 2025.