Ubuyobozi bw’akarere ka Kayonza bwasinyanye amasezerano y’ubufatanye n’umuryango Inshuti mu buzima (Partners In Health), azafasha mu guteza imbere ibikorwa by’ubuzima n’imibereho myiza y’abaturage mu karere ka Kayonza.

Bimwe mu bikorwa uyu muryango uzakorera mu karere ka Kayonza uyu mwaka harimo: gufasha abaturage kugera kuri serivisi z'ubuzima binyuze muri porogaramu zitandukanye, gutangira umusanzu w’ubwisungane mu kwivuza (mitiweri) abaturage barenga 5000, guteza imbere imibereho y'abaturage babaha amatungo magufi, gufasha mu bijyanye n'uburezi, kwita ku buzima bwo mu mutwe, gutera inkunga serivisi z'ubuzima mu bijyanye n'abakozi, guteza imbere serivisi za raboratwori, kubaka inyubako ikenewe kugirango serivisi yo kubaga itezwe imbere, n’ibindi.

Umuyobozi w’akarere ka Kayonza wungirije ushinzwe iterambere ry’ubukungu Munganyinka Hope yashimiye uruhare umufatanyabikorwa Inshuti mu buzima yagaragaje mu mwaka ushize by'umwihariko mu gihe cya Guma mu rugo yabaye mu gihugu hose muri werurwe 2020

Yasobanuye ko uyu muryango wafashije akarere n'abaturage bako mu buryo bugaragara ndetse kugera ubu ukaba ugikora igikorwa byinshi muri gahunda zo kurwanya COVID19 n'ingaruka zayo

PIH, ibikorwa byayo bigaragara mu byiciro byose by'ubuzima. Twabaye umuryango umwe nta n'ubwo mukiri abafatanyabikorwa gusa, kandi turabizeza ubufatanye kugirango tuzagere kuri byinshi kurushaho.